- حنان من الارياف
- ارضنا حضننا
- عرضنا دمنا
- شمسنا تنور دربنا
- ميتنا تربى زرعنا
- الكد طبعنا
- واقناعة من ربنا
- انا بنت من الارياف
- ابويا سمانى حنان
- جدعة وفى الشغل رهوان
- عاوز تشوف
- اقدم لك برهان
- زرعتنا مش كتير
- لكن انا بيها قنعان
- فيها سنابل
- وفيها كيزان
- وبناتنا لولى
- وولادنا شباب جدعان
- حوالينا دخان افران
- وعيش جاهز وعجين خمران
- قوتنا من ايدنا
- مش صنع اليابان
- وفى بلدنا خطيب
- ساعة الصلاة
- يرفع الاذان
- وحدانا كتاب
- يفهم القراية والقران
- وحدانا خوجة
- يعلم البنات والصبيان
- وارضنا كلها حنان
- فى المواسم
- تلبس فستان
- جميل ومبطش الوان
- اشى اخضر رويان
- تقولش ريحان
- واشى احمر مزهزه
- تقولشى نيشان
- واشى بمبه ساكت سهيان
- واشى ابيض شقايق نعمان
- واجمال حدانا جمالين
- جمال باين على السحنة
- وجمال خفيان
- حالف مايبان قبل الاوان
- وانا مصرية وابويا مصري
- من بوصى بنيت قصرى
- ومن الفجرية احزم خصرى
- وزرعتى قدام بصرى
- وميتنا سلسبيل
- وارد نهر النيل
- يعنى خلاصة القول
- او بدايتة ..زى ماتقول
- شقيانة لكن مرتاحة
- مستنية نصيبى بالراحة
- يطلب من عمرى اديله
- انور له فى الضلام ليله
- الاقيش عندك فنان
- بريشته يصور حنان
- فى بنت مصرية
- محافظة على قيمة الانسان..........الغيث الوفير" فاروق الباشا" مصر فى ٢٦/٥/٢٠١٦ سلمكم الله
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.